Adogadachem Durdev: Vaiyaktik ani Mansik Nuksanintlean Mell’llim Veusaiyk Jait!
Lekhok: Adogad Vinayak (Mama) D. Porob (Prabhu Punalekar)
Guneanvkari (Criminal) vokiili, chodd korun gombhir kesini, hem kallzache udok korpi kam’. Eka adogadachi namna suttiechea dhageavori nazuk asta; ti fokot tacha nimanya nikalacher tharta. Zaitea vorsanchem nikholl kam’ ani mell’llio suttka, eka nikalak lagon lok rokdech visrun votat. Lok ani vangaddi adogad legun, adogadachea zaitea jaitamporos eka harichi chodd yad dovortat. Haka lagon monant sodanch ek dhumkutt asta. Hea veusaient adogadachem mol tannem nimanya khotliant koshem kam’ kela, hacheruch zokhtat.
Hea guneanvkari mollar kam’ kortana sodanch guneanv, hinsa ani monshachem dukh pollovn monacher khol porinnam’ zata. Adogad zori bhavnam saun pois ravpacho yotn korta, tori khotlianchio filio hllu-hllu tacha monacher ghav ghaltat. Adogad fokot puraveancho obheas korina, tor piddit kuttumbanchio vollovllio taka zanvotat. Vell veta toso taka mansik thakva yeta. Kam’ chalu dovorpak kallzak koddok korchem poddta, punn haka lagon khagi jivitantli xantatai ani khoxi unni zait veta.
Ek criminal adogad chodd korun arophi ani sorkari sotta hanche modlea songhorxant ekloch zhuzta. Somajak navoddpi kesini adogadacher ttika zata. Tori legun, adogadannim aplim kortoveam pramanikponnan korchim poddtat. Haka lagon taka ekakiponn zanvota. Adogadacho vivek taka vatt dakhoyta, punn somaz chodd korun ogich ravta vo taka dox dita.
Poixeancho tann poristhiti anik ibaddtta. Adogadicho veusai choloupak pustokam, office bhaddem, pagar ani disopttiea khorcham khatir khub poixe lagtat. Tech borobar kuttumbachio gorzoi vaddot astat. Adogadichem utponn tharavik naslean sodanch arthik chinta asta. Thakva ailo tori kam’ korchemch poddta, karonn sonvsar oddop gorjechem asta.
Kortantlem kam’ kennanch sompona. Adogadachem mon kennanch kesintlean meklem zainna. Ratik legun monant vad-vivad ani fuddlio sunavnno ghollt astat. Adogad dusreachea suttke khatir zhuzta, punn sowatachi xantatai gomavn bosta. Kortovea khatir taka aplo vell ani visov soddcho poddta.
Sogleant vodd luksann ghora pollovpak melltta. Zaite fautti adogad kuddin kuttumba vangda aslo tori monan thuy nasta. Tachim chintnam kortant ani filiannich astat. Hacho porinnam’ ghorchea nateancher zata. Applea mogachea monshank vell divnk xoklo na, hacho taka sodanch uballo (guilt) yeta.
Hea kothinn veusaient itle tras sosun legun, adogadannim sodanch vozravori ghott ravp oxi opekxa somaz korta. Tann vo mansik trasan vixin uloup mhollear dublleponn oxem mantat. Adogad aple bhavnam lipoupak xiktat, punn haka lagon tankam puray thakva (burnout) yeta. Adogadichea veusaientle mansik tras manyo korop mhollear dublleponn nhoi, tor ti hea kamachi manvi bazu asa.
Loading ...