Mausa Savan Maika Meren: Goenchea Cricket-cho Gazpi Avaz!
Lekhak: Adv. Vinayak (Mama) D. Porob
Nadeem Ahmed hancho provas mhallear avodd ani jidd koxi fuddem vhorpachi, hacho ek vodd dekh (udaharan). Mahiti Tantradnean (IT) mollar xikxon ghevun, Electronics podvi ani hardware engineer-cho onubhav asun legit, tannem sangonokamukhar (computer) bospem soddlem ani Goenchea cricket-cho ek famad avaz zalo.
Dor vorsa pavsallo sompta ani Goeant cricket suru zata, tenna moidanacher Nadeem hanchoch avaz aikunk ieta. English ani Hindi bhaxentli tachi commentary ani ulovpachi poddot soglleank khub avoddtta. Dekhunuch, taka ‘Goenchea Cricket-cho Avaz’ mantat.
Commentary korpachi tachi survat 2010 vorsa zali. Cricket mogan taka M.P.T moidanacher eka T-20 tournament-ant poili sond mell’lli. Tachem cricket-chem ginean ani ulovpacho atmvixvas pollovun soglleanni tachi tokhnai keli. Thoinsun tachem novem career suru zalem.
Teach vorsa, Goa Cricket Association-an (GCA) jenna poili ‘Goa Professional League’ (GPL) suru keli, tenna Nadeem Ahmed hanka odhikrut commentator mhunn nemle. Tannem hem kam itlea bore toren kelem ki GCA-chea odhikareanni tacho khub bhovman kelo.
Uprant taka Fatorda moidanacher Bharat ani Australia modlea cricket match-ak commentary korpachi voddli sond mell’lli. Hea kamak lagun taka dexbor vollokh mell’lli. Tacho boro avaz, nitoll uchhar ani bhaxecher axilli pokkodd dekhun to Goeantlo ‘number one’ commentator zalo.
Tannem Modgonv, Xirodda, Vasco ani Balli sarkhea jageancher zaitea machamni kam kelam. Toxench, Rajasthan ani Gujarat hantuy te gelle. Itlench nhoi, tor Nepal-antlea Kathmandu xarant vochun tanni antor-raxttriy mollar kam kelam. Aso man mellovpi te Goenche eklech commentator.
Aiz legit GCA-chi poili posonti Nadeem Ahmed-ch astat. Goenchea voddlea league machamni tancho avaz astach, Ponnje Gymkhana ani her zaitea cricket club-am khatir te kam kortat.
Nadeem hanchi ek khaxeli gozal mhallear, te sodanch novem xikpak sodtat. Svota obheas korun tanni Hindi commentary-ntuy pravinye melloilam. Tanchea ulovpant cricket-chi mhaiti tor astach, punn tea vangdda ek veglloch hurblo (enthusiasm/energy) asta.
Aiz Nadeem Ahmed Goeantlo ek oti manacho commentator asa. Tancho ho ‘Mausa savan Maika’ merencho provas prerona dita. Tanchi mehenot polloilear, fuddem tancho avaz anik voddlea antor-raxttriy moidanacher gaztolo hantunt dubav na, dekhunuch tankam mogan ‘Goacho Ravi Shastri’ mhonnttat.
Loading ...