व्हायब्रंट गोवा समिट’द्वारे गोव्यातील २२० सूक्ष्म, लघु आणि मध्यम उद्योगांना मिळणार ३०० हून अधिक जागतिक खरेदीदारांशी जोडण्याची संधी

व्हायब्रंट गोवा समिट’द्वारे गोव्यातील २२० सूक्ष्म, लघु आणि मध्यम उद्योगांना मिळणार ३०० हून अधिक जागतिक खरेदीदारांशी जोडण्याची संधी

२९ ऑक्टोबरपासून सुरू होणाऱ्या तीन दिवसीय परिषदेत ५० हून अधिक देशांतील व्यावसायिक नेते येणार एकत्र

पणजी:’व्हायब्रंट गोवा ग्लोबल बिझनेस समिट २०२६’ (व्हीजीजीबीएस 2026) साठी जगभरातील आंतरराष्ट्रीय खरेदीदार, गुंतवणूकदार आणि व्यावसायिक नेते गोव्यात एकत्र येणार आहेत. ही परिषद २९ ते ३१ ऑक्टोबर दरम्यान, सेंट क्रूझ येथील गोवा विद्यापीठाच्या डॉ. श्यामा प्रसाद मुखर्जी इनडोअर स्टेडियममध्ये आयोजित केली जाणार आहे.व्हीजीजीबीएस २०२६ चे अध्यक्ष विनय वर्मा यांच्या नेतृत्वाखाली, ‘व्हायब्रंट गोवा फाउंडेशन’द्वारे ही परिषद आयोजित केली जात आहे. गोवा सरकारच्या उद्योग, व्यापार आणि वाणिज्य संचालनालयाच्या सहकार्याने होणारी ही परिषद व्यापार, उत्पादन आणि उद्योजकतेला बळकटी देण्यावर लक्ष केंद्रित करणार आहे. या कार्यक्रमात ५० हून अधिक देशांचे प्रतिनिधी सहभागी होणार आहेत. यामध्ये ७०० हून अधिक अर्जांतून निवडलेले ३०० हून अधिक आंतरराष्ट्रीय खरेदीदार, २०० हून अधिक प्रदर्शक, २० हून अधिक राजदूत व वाणिज्य दूतावासांचे प्रतिनिधी, २५ हून अधिक सरकारी नेते आणि १०,००० हून अधिक व्यावसायिक प्रतिनिधींचा समावेश असेल.

मुख्यमंत्री डॉ. प्रमोद सावंत उद्घाटन समारंभाला प्रमुख पाहुणे म्हणून उपस्थित राहणार आहेत. केंद्रीय मंत्री पियुष गोयल यांना निमंत्रित करण्यात आले आहे, तर भारतीय क्रिकेट संघाचे माजी कर्णधार कपिल देव समारोप सत्रात मुख्य मार्गदर्शन (की-नोट) करणार आहेत. केंद्रीय मंत्री अश्विनी वैष्णव यांनाही निमंत्रित करण्यात आले आहे. मूळचे गोव्याचे असलेले तामिळनाडूचे राज्यपाल राजेंद्र आर्लेकर यांनी ‘COGGE कॉन्क्लेव्ह’मध्ये सहभागी होण्याची पुष्टी केली आहे. या परिषदेचे मुख्य आकर्षण ‘रिव्हर्स बायर-सेलर मीट’ हे असेल. याद्वारे ३०० हून अधिक आंतरराष्ट्रीय खरेदीदारांना गोव्यातील २२० निवडक सूक्ष्म, लघु आणि मध्यम उद्योगांशी जोडले जाईल. सहभागी उद्योगांची निवड खरेदीदारांची मागणी, उत्पादनांची उपयुक्तता, निर्यातीची क्षमता आणि ऑर्डर पूर्ण करण्याची त्यांची सज्जता या निकषांच्या आधारे करण्यात आली आहे. खरेदीदारांच्या गरजा आगाऊ निश्चित केल्या गेल्या असून, तीन दिवसांच्या कालावधीत १,००० हून अधिक निवडक ‘बिझनेस-टू-बिझनेस’ बैठकांचे नियोजन करण्यात आले आहे. ‘व्हायब्रंट गोवा फाउंडेशन’ द्वारे, २०३७ पर्यंत ‘निर्यातक्षम एमएसएमई चॅम्पियन्स’ विकसित करण्याच्या प्रयत्नांचा एक भाग म्हणून, या बैठकांच्या निष्कर्षांचा मागोवा घेतला जाईल.

“ही शिखर परिषद एकाच उद्दिष्टावर आधारित आहे: गोव्यातील उत्पादनांना जागतिक पुरवठा साखळीत स्थान मिळवून देणे,” असे व्हीजीजीबीएस 2026 चे अध्यक्ष विनय वर्मा यांनी सांगितले. “आमच्या सूक्ष्म, लघु आणि मध्यम उद्योगांनी) खरेदीदारांच्या शोधात जगभर फिरण्याऐवजी, आम्ही अशा गंभीर आणि पूर्व-पात्र खरेदीदारांना गोव्यात आणत आहोत, ज्यांच्या गरजा स्पष्ट आहेत. १,००० हून अधिक बैठकांपैकी प्रत्येक बैठक ही प्रत्यक्ष मागणीवर आधारित आहे. शिखर परिषदेनंतरही आम्ही या उद्योगांसोबत राहून, त्यांच्या चर्चेचे रूपांतर प्रत्यक्ष ऑर्डर्स, निर्यात आणि रोजगारात करण्यासाठी मदत करू.” व्यावसायिक भागीदारी सुलभ करण्यासोबतच, ही शिखर परिषद गोव्याच्या अर्थव्यवस्थेला बळकट करण्याच्या आणि जागतिक बाजारपेठांशी संबंध विस्तारण्याच्या व्यापक महत्त्वाकांक्षेचे प्रतिबिंब आहे. मुख्यमंत्री डॉ. प्रमोद सावंत म्हणाले, “गोव्याने नेहमीच जगातील पर्यटकांचे स्वागत केले आहे. आता आम्हाला हवे आहे की, जगाने गोव्याकडे एक व्यावसायिक भागीदार म्हणून पाहावे.” राज्याच्या विकासाच्या प्राधान्यक्रमांना पंतप्रधान नरेंद्र मोदी यांच्या ‘विकसित भारत’ संकल्पनेशी जोडताना, मुख्यमंत्री डॉ. सावंत यांनी गोव्यातील आंतरराष्ट्रीय विमानतळ, इलेक्ट्रॉनिक्स उत्पादनातील महत्त्वाकांक्षा, विकसित होत असलेली स्टार्टअप परिसंस्था आणि कुशल मनुष्यबळ यांवर प्रकाश टाकला. ही शिखर परिषद ‘स्वयंपूर्ण गोवा’ या भावनेला व्यापक बाजारपेठांपर्यंत पोहोचवेल आणि त्याद्वारे रोजगार, उद्योजकता व निर्यातीच्या संधी निर्माण होतील, अशी अपेक्षा आहे. ‘GIBF’ सोबतच्या सामंजस्य करारांतर्गत आयोजित केली जाणारी चौथी ‘भारत-आफ्रिका बिझनेस कॉन्क्लेव्ह’ (India-Africa Business Conclave), ३० हून अधिक आफ्रिकन देशांचे प्रतिनिधी आणि भारतीय उद्योजकांना B2B (व्यावसायिक-व्यावसायिक) तसेच B2G (व्यावसायिक-सरकारी) बैठकांच्या माध्यमातून एकत्र आणेल.