रोमानियातील बी2बी टुरिझम आणि हॉस्पिटॅलिटी नेटवर्किंग कार्यक्रमात पर्यटन विभागाची व्हर्च्युअल सहभाग
पणजी, २८ नोव्हेंबर २०२५: रोमानियातील भारतीय दूतावासाने आज एक महत्त्वपूर्ण बी2बी टुरिझम आणि हॉस्पिटॅलिटी नेटवर्किंग कार्यक्रम आयोजित केला, ज्यात भारत आणि रोमानियातील पर्यटन क्षेत्रातील प्रतिनिधींनी सहभाग घेतला. गोवा पर्यटन विभागाने या कार्यक्रमात व्हर्च्युअली सहभाग नोंदवला. याचा उद्देश म्हणजे पर्यटन क्षेत्रातील द्विपक्षीय सहकार्य वाढवणे, बाजारपेठेत नवीन संबंध निर्माण करणे आणि दोन्ही देशांतील उद्योग भागीदारांसाठी नवीन संधी उघडणे.
माननीय पर्यटन मंत्री श्री रोहन ए. खंवटे म्हणाले, “गोवा आंतरराष्ट्रीय पर्यटन नकाशावर आपले स्थान अधिक मजबूत करत आहे. अशा कार्यक्रमांमधून आम्हाला गोव्याची सांस्कृतिक समृद्धी, रिजनरेटिव्ह टुरिझमची दृष्टी आणि जागतिक दर्जाच्या पर्यटन अनुभवांची माहिती नवीन बाजारपेठांना देता येते. रोमानियातील ट्रॅव्हल पार्टनर्सकडून मिळणारा प्रतिसाद उत्साहवर्धक आहे आणि आम्ही दोन्ही प्रदेशांना लाभदायक ठरणाऱ्या दीर्घकालीन सहकार्याची अपेक्षा ठेवतो.”
पर्यटन संचालक श्री केदार नाईक म्हणाले, “या कार्यक्रमातील आमचा सहभाग म्हणजे गोव्याची आंतरराष्ट्रीय उपस्थिती वाढवण्याच्या आमच्या बांधिलकीचे प्रतिबिंब आहे. रोमानिया ही वाढती आणि संभाव्य पर्यटन बाजारपेठ आहे. आजच्या संवादातून भविष्यातील सहकार्यासाठी चांगली पायाभरणी झाली आहे. आम्हाला गोव्याचे समुद्रकिनारे, वारसा, निसर्गरम्य हंटरलँड, वेलनेस आणि सण-उत्सव यांची माहिती या क्षेत्रातील प्रमुख निर्णयकर्त्यांपर्यंत पोहोचवता आली.”
या कार्यक्रमात गोवा पर्यटनाची माहिती सादर करणारी व्हर्च्युअल प्रेझेंटेशन श्री प्रविणकुमार फळदेसाई, वरिष्ठ व्यवस्थापक – जीटीडीसी, यांनी दिली. त्यांनी रोमानियातील उद्योग प्रतिनिधींशी संवाद साधत गोव्याची पर्यटन वैशिष्ट्ये, बदलणारी पर्यटन धोरणे आणि सहकार्याच्या नव्या संधी याबद्दल माहिती दिली.
या सत्रात श्री जयेश काणकोणकर, सहाय्यक संचालक (पर्यटन) आणि श्री मनोज कुमार मोहपात्रा, भारताचे रोमानियातील राजदूत यांनीही सहभाग घेतला. राजदूतांनी उद्घाटनपर भाषणात भारत–रोमानिया पर्यटन आणि सांस्कृतिक संबंध अधिक मजबूत करण्याची गरज अधोरेखित केली.
या कार्यक्रमात रोमानियातील अनेक टूर आणि ट्रॅव्हल कंपन्यांनी प्रत्यक्ष उपस्थित राहून भारतातील पर्यटन आणि हॉस्पिटॅलिटी क्षेत्रातील नवीन संधी जाणून घेतल्या. सहभागी मंडळींनी दोन्ही देशांतील पर्यटन भागीदारी वाढवणे, विविध पर्यटन मार्ग (सर्किट्स) विकसित करणे आणि पर्यटकांची देवाणघेवाण अधिक वाढवणे यावर चर्चा केली. या नेटवर्किंग सत्राने दोन्ही देशांतील प्रतिनिधींमध्ये अर्थपूर्ण संवाद घडवून आणला, व्यावसायिक संबंध मजबूत केले आणि भविष्यातील पर्यटन विकासासाठी सामायिक दृष्टिकोन अधोरेखित केला.
भारतीय दूतावासाने रोमानियातील भागीदारांबरोबर हे सहकार्य पुढेही वाढवण्याची आणि भारत–रोमानिया पर्यटन क्षेत्रात नवीन संधी निर्माण करण्याची अपेक्षा व्यक्त केली आहे.
Loading ...